Lou Galejoun blanc se recounèis bèn emé soun grand còu, soun long bè, si lóngi pato e sa coulour blanco.
Presènto pas de vertadié dimourfirme seissuau (li coulour dóu mascle soun soucamen un pau mai vivo en poutannado nouvialo).
La formo en S de soun còu replega es caracteristi de l'espèço..
Lou bè es long, jaune à jaune-arange, subre-tout dóu tèms nouviau.
lou plumage es blanc en plen.
Dóu tèms de la reproducioun, aparèis l'eigreto : de plumo blanco, lóugiero, ournativo sus l'esquino et lou pitre (jamai la tèsto).
A n'aquesto tempouro, li partido nudo s'acoulourisson.
Soun crid "kraaaah" (quouro pren sa voulado s'es destourba) es rau e grèu.
Li Galejoun blanc soun moutounié pèr passa la niue e dóu tèms de la reprouducioun.
La femello pound 4 à 6 iòu. Lou mascle e la femello li couvon 25 jour de tèms.
Li pichot reston au nis 15 jour, pièis prenon soun vòu à 35-40 jour. Lou Galejoun blanc manjo subre-tout de pèis mai tambèn de granouio, de serp, de rato-courto...
Au nostre l'espèci se carrejo bèn. Es poussible d'en vèire en Camargo.

Etimoulougìo : - Galejoun: d'après Honnorat, vèn dóu noum d'un estang à coustat de Fos (estang Galejon).
                       - blanc : bord que tóuti si plumo soun blanco..

Lou Galejoun grand es esta descri pèr Carl von Linné en 1758 souto lou noum de Ardea alba.(Gènre : Ardea, Carl von Linné, 1758)
I'a 4 souto-espèci de Galejoun blanc recouneigudo pèr lou coungrès ournitoulougi internaciounau.
Li souto-espèci soun pau diferènto en deforo de la tempouro de la reproducioun. Anèn vèire li diferènci nouvialo.

Ardea alba alba

A. a. alba es esta descri pèr Carl von Linné, en 1758.

Galejoun blanc nouviau : lou bè jaune devèn negre, li loro (entre lou bè et l'uei) de jaunasso passon au verd e li pato negro devenon rougenco.

Palun nord de la Capelièro (Prouvènço ; Plano de coustiero ; Camargo)

Estang dóu pargue de Ranthambore (Indo ; Rajasthan)

Ardea alba melanorhynchos

A. c. melanorhynchos es esta descri pèr Johann Georg Wagler, en 1827.

Galejoun blanc nouviau : lou bè jaune devèn negre, li loro passon au blu-verd e li pato reston negro.

Lau de Sahambavi (Madagascar ; Matsiatra Ambony)

Lau Naivasha (Kenya ; Relarg de Nakuru)

Ardea alba modesta

A. c. modesta es esta descri pèr John Edward Gray, en 1831.

Es une souto-espèci mai pichoto que lis àutri. D'ùni an vougu n'en faire une espèci à despart, mai l'estùdi geneti a moustra qu'èro pas necite. Nouviau : lou bè jaune-arange devèn forço negre, li loro de jaunasso passon au blu-verd e li pato devenon roso, rougenco o vióuletenco.

Estang à Gyeongju (Courèio ; Gyeongsangbuk-do)

Ardea alba egretta

A. c. modesta es esta descri pèr Johann Friedrich Gmelin, en 1789.

Nouviau : lou bè jaune devèn jaune-arange, li loro de jaunasso passon au verd e li pato reston negro.

Port de Banquerizo Moreno (Galapagos ; Isclo de San Cristòbal)

Desparticioun

terro-nostro.fr : site en prouvènçau sus la naturo en Prouvènço e aiours        © Terro Nostro 2026