Istòri Nostro Istòri Nostro


Óucupacioun roumano




      En 200 av.J.C., Roumo, vincèiris de Cartage, óucupavo touto l'Espagno.
Massilia emé sa pouderouso floto fasié regna la pas sus la mar.
En mieterrano, Roumo avié besoun de Massilia. Sus terro Massilia avié besoun de Romo.

      Massilia e la federacioun Sàli visquèron relativamen coutrìo durant quatre siècle.
Fugué pas parié emé li tribu entre Var e Aup que vivien de la piratarié.

      En 180 av.J.C., Massalia apelè soun alia Roumo. Sis armado ameisèron aquéli tribu.
En 154 av.J.C., la piratarié reprenguè. li Rouman seviguèron duramen, óucupèron lou païs,
meteguèron la poupulacioun en esclavage e dounèron lou marage i massaliote.

      Vers la mita dóu siècle II av.J.C., Massilia s'aproupriè, pèr soun coumerce, d'ùni terro long dóu Rose e Durènço.
Li Sàli se rebrassèron, en 125 ataquèron Massalia que cridè soun aliado Roumo.
Alor Roumo se pensè que pèr gouverna l'Espagno farié mestié de counquista tout lou païs ligour.

En 125 av.J.C., proumiero vitòri pèr Quintus Favius Flacus.
Vitòri counfiermado en 123 pèr Caius Sextius.
Li Sàli veguèron Entremount e Roco-Pertuso avali.
Caius Sextius planté definitivamen caviho en batissènt pèr lou sèti de soun armado la ciéuta d'Aquae Sextiae (Ais).

      Lou conse Domitius fugué carga de la segureta au nord de Durènço.
Devié se batre contro lis Alobroge e lis Averne. Prenguè tóuti li païs entre Rose e Aup, fin souto Lugdunum (Lioun).
      De soun coustat, Caius Sextius counqueriguè dóu Rose i Pirenèu.

Istòri Nostro

      Roumo decidè de faire uno prouvinço di païs ainsi counquist e de basti uno capitalo dins un gou de la Mediterragno.
Fuguè Narbouno. La prouvinço fuguè noumado Prouvincia Narbonensis.


      I'avié pas des an que Narbouno èro espelido que la prouvinço fuguè envahido pèr uno armado vengudo de la Baltico : Li Téuton1.
Li troupo roumano fuguèron batudo à Arausio (Aurenjo) lou 6 d'óutoubre de 105.
Li Téutoun passèron lou Rose e anèron en Espagno. Èron uno troupo vagando emé de carriòu pourtant femo, enfant e si besougno. Coume li bóudròu, li Téutoun tre qu'avien plus de vièure sus un païs, envahissien la countrado vesino.

Li Rouman pensant que li Téutoun poudien reveni mandèron Marius emé cinq legioun. Campè si troupo à Ernaginum (San Gabriéu), passage entre Aupiho e Rose.
En esperant l'enemi, Marius oucupè sis ome à faire un canau navigable d'Arelate à la mar : Fossae Marianae.

Istòri Nostro

      Èi soulamen en 102 que li Téuton revenguèron.
Marius li laisso passa. Li téuton davalèron vers Massalia. Li barbaro2 avièn pas fini de passa que, dins la niue, Marius, à la chut-chut, partiè en avans di Téuton, prenié plaço sus l'auturo e l'endeman-de-matin toumbè sus l'enemi à bras vira.
Après dous jour de batesto, li tèuton virèron brido vers Aquae Sextius.
Mai, en amount, dins la valado de l'Arc, estènt en malur, li Téuton troubèron uno armado liguro que barravo un estré camin.
Fuguèron enciéucla pèr li Ligour e li Rouman.
Lou pople téuton, ome, femo, enfant e carriòu toumba en douliho. Se n'es plus entendu parla.

Marius mena en esclavage li rare subre-vivènt e se revirant à Roumo dounè i massaliote lou canau de Fos.

Marius avié de liéura, ansin, la Provincia narbounensis e Massalia di barbare2.
Es pèr amor d'acò que se parlo encaro en Prouvènço de Marius coume d'un grand capitàni.




Noto dóu mouderaire : 1Li Cimbre, li Téuton, lis Ambroun e li Tigurin peraqui 200 000 migrant.
2Barbare pèr li Rouman : tóuti li pople à despart di Grè e di Rouman.

terro-nostro.fr : site en prouvençau        © Terro Nostro 2020