Annibau, lou cartaginés

      Lou role di cartaginés dins l'istòri de noste païs èi gaire impourtanto, mai lou passage d'Annibau en Prouvènço pèr ana d'Espagno en Itàli a marca li poupulacioun.

      Quant de ciéuta, long dóu Rose, pretendon èstre esta lou catoun qu'Annibau ié passè emé si chivau e sis elefant ? Quant de valado, dis Aup, an visto passa l'armado cartagineso ?

      Lis istourian an jamai sachu ounte Annibau a passa lou Rose, ounte a passa lis Aup.
      Acò pòu s'esplica. Annibau voulié garda tóuti si troupo pèr ataca Roumo en Itàli. Mai Roumo éro en trin de desbarca dos legioun
(2 x 3000 ome) à Massilia. Alor Annibau remounto lou Rose rapidamen. Lis armado an passa lou Rose en tóuti lis endré qu'èron poussible. Ansin quand uno troupo s'arrestavo pèr passa lou Rose, aquelo que seguissié, anavo passa plus amount.

      Aquelo guerro, qu'escouneigudo souto lou noum de la segoundo guerro punico, fuguè declarado pèr Roumo en 219 av.j.c., quouro Cartajo prenguè pèd à Sagonte en Espagno, ciéuta qu'èro aliado à Roumo.
      Annibau, emé 60.000 ome, passè li pirenèu e remountant lou Rose lou passè, probablamen, entre Bèu-Caire e Pont-St-Esprit.

      Scipioun, lou capo di legioun roumano, arribant en Durènço, se rendeguè comte bèn lèu que li troupo d'Annibau s'escoundien dins lou setentrioun e s'entournè à Roumo.
      Annibau, après aguè countourna lou païs di Voucounci e di Cavare, dins l'impoussibleta de countinua au païs dis Alobroge, revenguè vers Durènço pèr passa lis Aup e desbouca en Gaulo cisaupino (Piemout).